Herbir halkın kultura uuru belli olȇr onun davranışından geçmişin yaşamak için tecil hem önemni kiymetlerinä, hepsinä, nedän düzülü onun ruh tradiţiyaları. Dedelerimiz braktılar bizä zengin kultura mirası, angısı bir çöşmä gibi temizleer hem yaşattırȇr bizim ruh hem moral temellerimizi. Asirlär boyunca onnar tenä-tenä topladılar, korudular da aktardılar boydan-boya türlü faydalı bilgileri hem halk aarifliini. Bölä bilgilerin hem halk aariflii kaynaklarının sayısına girer tradiţional kalendar adetleri hem adet sıraları, angıların temelindä durȇr insanın hergünkü zaameti. Kalendar adetleri doorudulu topraan bereketinä hem aylenin selemetinä da göstererlär uzak dedelerimizin din-mifologiya görüşünü dolayındakı naturaya hem denemeklerini etkilemää onu.Gerçek bildirim açıklȇȇr Bucakta yaşayan gagauzların tradiţional Kolada adetlerini. Bucak büünkü Moldova Respublikasının hem Ukrainadakı Odesa bölgesinin üülen tarafında bulunan istoriya bölgesidir. Burada ikiüz yıldan zeedä türlü etnika grupaları arasında ilerleer kultura ilişkileri hem baalantıları, angıları etkileyip-görünerlär halk kalendarının elementlerindä. Hristozun Duumasını ortodoks hristiannar tutȇrlar dekabrinin 25-dä (yanvarın 7-dä), angısı aşaa-yukarı düşer kış gün dönümünä. Koladadan birkaç gün ileri delikannılar hem evli adamnar toplanarmış kolada çetelerinä, onnarın başıymış görgülü, adetçä evli adam, angısına deyärmişlär «ţar». O önderlärmiş yortuya hazırlanmayı.
Üürenärmişlär kolada türkülerinin peetlerini, taa çok bulgar ya da moldovan dilindä, bütün yortunun sırasını (hazırlanmak geçärmiş ya «ţarın» evindä, ya da maasuz bu iş için kiralanmış evdä).Kolada gezmäk başlarmış Koladaya karşı, açan küçük hem 7-14 yaşında uşaklar çetä-çetä gezärmişlär küüdä evdän-evä, çalarak türküleri, bereket hem selemet dualarını. Koladacılar ya içeri girärmişlär ya da pençerä yanında durarmışlar (taa sık). Çorbacı verärmiş koladacılara türlü baaşış – kolada kolacı, kovrik, para ya da yaşayış işlerindän bişey (gölmek, peşkir, materiya platı).Bundan kaarä kolada türkülerini çalȇrlar Kolada günü dä, ama artık gezerlär gençlär çeteleri (20-25 yaşında). Koladacılar giiyärmiş maasuz yortu rubalarını – kara kürk hem don, çizmä hem kalpak, angılarına takılıymış renkli kiyat çiçeklerindän yapılı feneţ. Çorbacı çaardıynan, koladacılar girärmişlär içeri, saçarmışlar booday da girişärmişlär çalmaa kolada türkülerini. Herbir çorbacı iştärmiş, koladacılar uurasın onun evinä, gösterip sayıgı, ama ilkin çetä girärmiş o evlerä, neredä varmış gözäl delikannı kız, çünkü herkezi savaşarmış düşmää yavklusu yaşadıı maaleyä. En tipik kolada türkülerindä metediler evin selemeti, çorbacının hem evdekilerin kiymetleri, dua ediler gelän yılda bereket. Örnek verelim kolada türküsünün fragmentini, angısında peydalanȇr ayozlar Petri hem Dimitri: «Седнали се Светим Петар и Димитар, «Oturarmış Ay Petri hem Ay Dimitri,Седнали се да советват, Oturarmışlar da lafedärmişlär,Седнали се малу млогу Oturmuşlar az mı, çok mu Два дня три дня İki gün, üç gün И три ношти. Hem üç gecä.И утговаря Свети Димитар: Da cuvap eder Ay Dimitri:„Ай гиде время, лятну время, „Ah-ah, vakıt, yaz vakıdı,Се попоташа сас таргофче, Yollarda bezirgennärlän, Се чайире сас [o]вчаре”. Çayırlarda çobannarlan”.И утговаря Свети Петар: Da cuvap eder Ay Petri:„Ай гиде время, зимне время, „Ah-ah, vakıt, kış vakıdı,Всих амбары з желту жыту, Ambarlarda sarı ekinnärlän,Се миханы з ройну вину…”» Kırçmalarda köpüklü şaraplan…”».[Moşkov V. Наречия бессарабских гагаузов // Образцы народной литературы тюркских племен, изд. В. Радловым. Санкт-Петербург, 1904. С. 319]. Kolada vardı nicä sürtsün üç gün, sabaadan üülenä kadar 7-12 yaşında çocucaklar gezärmişlär evdän-evä stävaylan (biyaz kiyatlan sarılı, renkli şiritçiklärlän donaklı elek çemberinä koyulmuş ikona), uurayıp komuşularına, senselelerinä, dostlarına. Olmalı, bu adetin adı, nicä dä kendisi adet alındı moldovan komuşulardan. Stävanın önündä çalarkan maasuz türküleri ya bulgar, ya moldovan dilindä, koladacıların biri trakayı urȇr hem saçȇr erä booday. Bu nışannȇȇr eni yılda bereket hem varlık. Bunun için çorbacılar vererlär koladacılara tatlılık, kovrik, ufak para. Moldovan/romın dilindä bir kolada türküsü örnek verelim (kimi bozulmaklarlan sölentidä):«Sus, băieri, [nu] măi dîrmeţ, «Kalkın, boyarlar, da başka uyumayın,Vremea so vo strîzeţ, Geldi vakıt uyanmaa,Casa sa va maturaţi, lerule, Evinizi süpürmää, lerule,Şi pe masa încîrcaţi, lerule, Hem sofraları kurmaa, lerule,Ca umblăm şi colindăm Biz Kolada gezerizŞi pe Domnul lăudăm» Hem Allahı metederiz». [Avtorun toplanılmış materialları] Butakım, Bucakta yaşayan gagauzların tradiţional kolada adetleri göstererlär yortunun halk harakterini – eski çiftçilik yılının sonunu hem eninin başlantısını, ama kimi kolada türkülerindä göreriz din hem klisä etkisini: Allah, ayozlar Petri hem Dimitri, ayoz dedä moş Krȇçun, İisus Hristos h. b., başka laflarlan, onnarda belli olȇr pagın hem hristian sinkretizması. Vitaliy SIRF https://www.facebook.com/gagauz.bilim.7